Алматы қаласы бойынша Қаржылық мониторинг агенттігінің департаменті "Amir Capital" атты қаржы пирамидасын құру және оны басқару дерегі бойынша тергеу жүргізіп жатыр, - деп хабарлайды Aqshamnews.kz тілшісі. Бұл туралы агенттіктің баспасөз қызметі мәлімдеді.
Ресми мәліметке сәйкес, өзін халықаралық инвестициялық қор ретінде көрсеткен "Amir Capital" компаниясы үш жыл бойы Қазақстан, Беларусь, Ресей және Қырғызстан азаматтарынан криптовалюта саудасы, майнинг және түрлі жобаларға инвестициялау арқылы 5–10% табыс уәде етіп, қаржы тартқан.
Инвесторлар компанияның ресми сайты арқылы жолданған реферальды сілтемелер бойынша тіркелген. Қаражат USDT, BTC, ETH сияқты криптовалюта түрінде Amir Wallet әмиянына аударылып отырған.
Агенттіктің мәліметінше, түскен қаражат қаржы пирамидасының классикалық принципімен бөлінген. Бұрын тіркелген қатысушыларға төлемдер кейінгі салымшылардың ақшасынан төленіп келген. Осы жоспармен 40-тан астам адам тартылған.
2021 жылдың соңында салымшылардың "amir.capital" платформасынан қаражат шығару мүмкіндігі тоқтатылған. Ұйымдастырушылар техникалық ақау деген желеумен төлемдерді қайта бастайтынын айтқанымен, қаражат қайтарылмаған.
Тергеу барысында құны 10 млн АҚШ долларынан асатын криптоактивтер және Алматы облысындағы жер телімі бұғатталды. Күдіктілердің бірі сот санкциясымен екі айға қамауға алынды.
ҚМА тергеуді жалғастырып жатыр. ҚР Қылмыстық-процестік кодексінің 201-бабына сәйкес өзге деректер жариялауға жатпайды.