Қаржы министрлігі мектептер мен балабақшаларда жүргізілген аудит барысында миллиардтан астам теңгенің ұрланғанын анықтады. Тексеру барысында 36 ұйымнан заң бұзушылықтар табылды, деп хабарлайды aqshamnews.kz
Ведомство бюджет қаражатын ұрлаудың ең кең таралған схемаларымен бөлісті:
1. Қосарланған есеп және жалақыны көтеру: Мысалы, Ақтөбе қаласындағы №48 орта мектепте бухгалтердің ресми жалақысы жылына шамамен 700 мың теңгені құраған. Алайда, шын мәнінде, сол қызметкердің картасына ай сайын 3-5 миллион теңге аударылып отырған.
2. Жалған қызметкерлерге ақша аудару: Құжаттар бойынша бір қызметкерге жалақы есептелгенімен, іс жүзінде басқа адамдардың есепшоттары пайдаланылған. Мысалы, Қарағанды қаласындағы №33 балабақшада ондаған қызметкердің жалақысы екі бухгалтердің карталарына аударылған. Бұл алаяқтықтың нәтижесінде 207,4 миллион теңге ұрланған.
3. Аномальды жоғары сомалармен қайталанатын аударымдар: Петропавл қаласындағы №42 орта мектептің бас бухгалтері мен информатика пәні мұғалімі тек 2023 жылдың өзінде айына үш реттен артық көтерілген жалақы алған. Бұл әрекеттердің салдарынан жалпы шығын 69 миллион теңгені құраған.
Қаржы министрлігінің баспасөз қызметі бұл схемалардың тек ең танымалдары екенін атап өтті. Мұндай алаяқтық әрекеттер бюджет қаражатын ұрлаудың түрлі тәсілдері арқылы жасалған.