Алматыдағы "164 бөбекжай-балабақшада" балалардың дұрыс тамақтанбайтыны туралы бұрын хабарлағанбыз.
Әлеуметтік желіде тараған бейнежазба негізінде Алматы қаласы білім басқармасы құрған арнайы комиссия 164 бөбекжай-балабақшасына тексеру жүргізіп, бірнеше маманды жұмыстан шығарды, деп хабарлайды Almaty-akshamy.kz қалалық білім басқармасының баспасөз қызметіне сілтеме жасап.
"Мониторинг барысында анықталған заңбұзушылықтар бойынша, сондай-ақ қызметтік міндеттеріне жосықсыз қарағаны үшін балабақша меңгерушісі, медбике және әдіскері қызметінен босатылды. Сонымен қатар, топ тәрбиешісі, қоймашы және аспазшыға тәртіптік жаза қолданылды", - деп мәлімдеді қалалық білім басқармасының баспасөз қызметі.
Қаладағы мектепке дейінгі ұйымдардың жұмысына бақылауды әлсіреткені үшін Алатау аудандық білім бөлімінің бас маманы мен Алматы қаласы білім басқармасының мектепке дейінгі тәрбие мен оқыту бөлімінің басшысына тәртіптік жаза қолданылды.