Маман тапшылығына жалақының аздығы себеп.
Оқу-ағарту министрлігі Ерте жастағы балаларды дамыту институтының директоры Манара Адамованың мәлімдеуінше, мектепке дейінгі ұйымдарда 15 мыңға жуық тәрбиеші жетіспейді, деп хабарлайды Almaty-akshamy.kz
"Бүгінгі таңда 15 мыңдай тәрбиеші жетіспейді. Әрине, бірінші себебі, жасыратыны жоқ, жалақының аздығы. Жалақы аз болғаннан кейін жас мамандар тарапынан қызығушылық жоқ. Содан кейін жұмыс істеп жүрген мамандар біраз тәжірибе жинағаннан кейін айлығы көп мектепке ауысып кетіп жатады. Айналып келгенде, барлығы жалақының аздығына байланысты болып тұр", - деді Адамова орталық коммуникациялар қызметінде өткен баспасөз мәслихатында.
Ол балабақша саны көп өңірлерде тапшылық қатты сезілетінін атап өтті. Олар Түркістан мен Алматы облыстары, Астана қаласы.
Институт директорының мәліметінше, Қазақстанда 11 104 мектепке дейінгі ұйым бар. Оның ішіне балабақшалар да, шағын орталықтар да кіреді. Оларда 1 миллионнан астам бүлдіршін тәрбиеленіп жатыр. Балабақшалардың 70 пайызы қазақ тілінде тәрбие береді.