Ұлытау облысында қаржы пирамидасын ұйымдастырған адам сотталды, - деп хабарлайды aqshamnews.kz тілшісі.
Жезқазған қалалық соты қаржы пирамидасын ұйымдастырып, 22 адамға жалпы сомасы 27 млн теңгеге шығын келтірген қала тұрғынын кінәлі деп таныды.
2024 жылғы наурыз мен желтоқсан аралығында ол компания кеңсесінде кездесулер өткізіп, жаңа қатысушыларды тіркеумен, компания жүйесінде аккаунттар құрумен және Telegram мессенджері арқылы үгіт материалдарын таратумен айналысқан.
Бұл қызмет азаматтарды электрон валютаға инвестиция салу және бонустар алу сылтауымен жүйеге тартуға бағытталған.
Сот үкімімен кінәлі адамға 5 жыл бас бостандығын айыру жазасы тағайындалды.
Үкім заңды күшіне енген жоқ.
Прокуратура азаматтарға қырағы болуды, компаниялардың қаржылық қызметін және олардың тиісті лицензияларының болуын тексеруді, сондай-ақ қаржылық пирамидаларының белгілері бар схемаларға қатыспауды ескертеді.