Зүлфия Болатқызы Сүлейменова 1990 жылғы 25 ақпанда Ақтөбе қаласында дүниеге келген, - деп хабарлайды Aqshamnews.kz.
Ол 2012 жылы Л.Н. Гумилев атындағы Еуразия ұлттық университетін «Халықаралық қатынастар» мамандығы бойынша тәмамдады. 2014 жылы халықаралық қатынастар магистрі дәрежесін алды. 2016 жылдан бастап Жапонияның Ұлттық саяси зерттеулер институтында (GRIPS) PhD докторантура бағдарламасы бойынша білім алған.
Еңбек жолын 2013 жылы бастаған.
2014 жылдан бастап ҚР Президенті жанындағы Қазақстан стратегиялық зерттеулер институтында (ҚСЗИ) сыртқы саясат және халықаралық қауіпсіздік бөлімінің ғылыми қызметкері болып жұмыс істеді.
2015–2017 жылдары БҰҰ Азия және Тынық мұхиты үшін экономикалық және әлеуметтік комиссиясында (ЭСКАТО) қоршаған орта және даму, энергетика, макроэкономикалық саясат және даму қаржыландыру бөлімдерінде қызмет атқарды (Бангкок, Тайланд).
2019 жылдан бастап БҰҰ Даму бағдарламасында (БҰҰДБ) Түрікменстан мен Қазақстандағы жобаларға, сондай-ақ ЭСКАТО-ның қоршаған орта және даму бөлімінің жұмысына қатысқан.
2019 жылы Президенттік жастар кадр резервіне енді.
2020 жылдан – ҚР Экология, геология және табиғи ресурстар министрлігінің климаттық саясат және жасыл технологиялар департаменті директорының орынбасары.
2021–2022 жылдары – VII шақырылымдағы Мәжіліс депутаты, Халықаралық істер, қорғаныс және қауіпсіздік комитетінің мүшесі.
2022 жылғы наурыздан – ҚР Экология, геология және табиғи ресурстар вице-министрі.
2023 жылғы қаңтардан қыркүйекке дейін – ҚР Экология және табиғи ресурстар министрі.
2023 жылғы қыркүйектен 2025 жылғы қыркүйекке дейін – Қазақстан Президентінің халықаралық экологиялық ынтымақтастық жөніндегі арнайы өкілі қызметін атқарды.