Түркістан облысы Ордабасы ауданына қарасты Төрткүл ауылында жол жиегінен мәйіті табылған 16 жастағы қыздың өліміне қатысты іс ауданаралық қылмыстық істер жөніндегі сотта жабық түрде қаралатын болды, - деп хабарлайды Аqshamnews.kz тілшісі Otyrar.kz-ке сілтеме жасап.
Тергеу ісі Қылмыстық кодекстегі «Адам өлтіру», «Зорлау» және «Сексуалдық сипаттағы зорлық-зомбылық әрекеттері» баптарымен жүргізіліп жатыр.
Қайғылы оқиға биыл 6 маусымға қараған түні болған. Ауыл тұрғындарының айтуынша, жасөспірім әдеттегідей отбасының дүкенінен үйіне қарай шыққан, алайда сол күйі оралмаған. Туыстары мен ауыл тұрғындары полициямен бірге оны түні бойы іздегенімен, таба алмаған.
Келесі күні таңертең полицейлер қыздың мәйітін жол бойындағы балабақша маңынан тапқан.
Басылымның мәліметінше, сол күні қыздың отбасы иелік ететін дүкенге жақын орналасқан наубайханада жұмыс істейтін шетелдік еңбек мигрантын полиция ұстаған. Ал ауылда байланыс уақытша үзілгенде, тәртіп сақшылары күзет шараларын күшейткен.