Қаламыздың Оқушылар сарайында жұмысшы мамандықтар жылына орайластырылған «Zhas Maman 2025» кәсіпкерлер жәрмеңкесі өтті.
Аталған іс-шараға 3 000-нан астам тоғызыншы сынып оқушысы келді. Бұл жәрмеңке шәкірттерге болашақ мамандықты таңдауда бағыт-бағдар болды. Жәрмеңкеге 50-ден астам колледж қатысты. Оларға түрлі салаға мамандар даярлауға бағытталған білім беру бағдарламаларының кең спектрі ұсынылды. Бұл бастама жоғары сынып оқушылары үшін үлкен маңызға ие. Өйткені, дәл осындай шара жасөспірімдерге мамандық таңдаудың маңызын түсінуге әрі оларды табысты мансап жолына бағыттауға көмектеседі.
Іс-шараны ұйымдастырушылар – Медеу ауданының білім бөлімі мен № 64-мектеп. «Атамекен» палатасының қызметкерлері қалалық Білім басқармасымен бірлескен жұмыс жоспары аясында спикерлер ретінде қатысты. Себебі, палата оқушыларды дуальды оқыту мен кәсіптік бағдарлау аясында кәсіпорындармен белсенді өзара іс-қимыл жасайды. Бұл үшін жыл бойына түрлі конференция, «дөңгелек үстел» үрдісіндегі жиындар, оқушыларды жұмысшы мамандықтармен таныстыруға қала кәсіпорындарына танымдық экскурсиялар жоспарланған.
Сонымен қатар, палата әр жастағы адамдарға жұмысшы мамандығын алу үшін қысқа мерзімді курстар өткізуге, дуальді оқыту бағдарламасын іске асыруға, кәсіптік бағдар беруге байланысты түрлі іс-шараға, сондай-ақ кәсіпкерлерді сұранысқа ие жұмысшы кәсіптерінің маманын даярлауға қолдау көрсетуде. Бұл жөнінде форумда Алматы қаласы кәсіпкерлер палатасының кәсіпкерлерді қолдау және дамыту бөлімінің жетекші маманы Жанар Ибрагимова айтып берді. Бұл шара кәсіби бағдар беру мен осы күнгі еңбек нарығының сын-қатерлеріне дайын жастарды даярлау мәселесіне кешенді көзқарастың маңыздылығын ерекше көрсетті.