Сәрсенбі күні Қазақстанның көп өңірінде ауа райы құбылмалы болады, деп хабарлайды Aqshamnews.kz тілшісі «Қазгидрометке» сілтеме жасап.
Синоптиктердің мәліметінше, ел аумағының басым бөлігінде жаңбыр жауып, найзағай ойнайды. Кей өңірлерде бұршақ жауып, жел күшейеді. Батыс, солтүстік-батыс, оңтүстік, оңтүстік-шығыс және орталық өңірлерде қатты жаңбыр күтіледі. Тек республиканың шығысында жауын-шашынсыз ауа райы сақталады.
Алматыда күн ала бұлтты болады. Күндіз жаңбыр жауып, найзағай ойнайды, кешке кей уақытта қатты жаңбыр күтіледі. Жел екпіні күндіз 15 м/с-қа дейін жетеді. Ауа температурасы түнде +15…+17, күндіз +25…+27 градус болады.
Астанада күндіз өткінші жаңбыр жауып, найзағай ойнайды. Ауа температурасы түнде +14…+16, күндіз +30…+32 градус.
Шымкентте жаңбыр, найзағай, дауыл және бұршақ болжанып отыр. Түнде және таңертең қатты жаңбыр жаууы мүмкін. Күндіз жел екпіні 23 м/с-қа дейін күшейеді.
Сонымен қатар бірқатар өңірде жоғары және төтенше өрт қаупі сақталады. Алдағы екі тәулікте жауын-шашынға байланысты оңтүстік және оңтүстік-шығыстағы тау өзендерінде су деңгейі құбылуы мүмкін.