«Жан-Сая» дағдарыс орталығы Алматының Өңірлік коммуникациялар қызметіне тұрмыстық зорлық-зомбылық тақырыбын жариялауға қолдау көрсеткені үшін алғыс білдірді, – деп хабарлайды aqshamnews.kz тілшісі.
«Жан-Сая» дағдарыс орталығының өкілдері Алматы қаласының Өңірлік коммуникациялар қызметіне көпжылдық ынтымақтастығы және жақында өткен баспасөз турын ұйымдастыруға қолдау көрсеткені үшін алғыс хат табыстады. Аталған шара орталықтың қызметі мен тұрмыстық зорлық-зомбылық мәселесін кеңінен таныстыруға мүмкіндік берген маңызды ақпарат алаңына айналды.
Баспасөз туры қоғамда үлкен резонанс тудырып, журналистер қауымының қызығушылығын арттырды. Ашық диалог пен ақпаратқа қолжетімділіктің арқасында қиын өмірлік жағдайға тап болған әйелдер мен балаларды қорғау тақырыбы медиа кеңістікте кеңінен қамтылып, қоғам назарын аударудың жаңа деңгейіне шықты.
Алғыс ретінде табысталған қолөнер туындысы – «киіз үй» сыйлығы ерекше мәнге ие болды. Бұл дәстүрлі сый тек ұлттық нақыштың көрінісі ғана емес, сонымен қатар бірлік пен қолдаудың символына айналды. Бүгінде «Жан-Сая» дағдарыс орталығы өмірлік қиын жағдайға тап болған немесе зорлық-зомбылық көрген әйелдер мен балаларға пана болып, оларға көмек пен үміт сыйлайтын «шаңырақ» қызметін атқарып отыр.