Жамбыл облысында кене шаққан ер адам Конго-Қырым геморрагиялық безгегінен көз жұмды, деп хабарлайды Aqshamnews.kz тілшісі.
Қайғылы жағдай Шу ауданында тіркелген. Малшыны кене шағып, алайда ол дер кезінде медициналық көмекке жүгінбеген. Мамандардың айтуынша, науқас уақытында екпе алмағандықтан ауру асқынып кеткен.
Қазір облыста кене шаққан 300-ге жуық адам дәрігерлердің бақылауына алынған. Олардың қанынан қауіпті инфекция анықталмағанымен, өңірде аурудың таралу қаупі жоғары болып отыр.
Мамандардың мәліметінше, Жамбыл облысында көктемгі зерттеу жұмыстары басталған. Табиғи ошақтардан жиналған 2700-ден астам кене зертханаға жіберіліп, олардың 151-інен Конго-Қырым геморрагиялық безгегінің қоздырғышы табылған.
Бұған дейін өңірдегі 42 елді мекен қауіпті індет ошағы ретінде тіркелген. Қазір аталған аумақтарда қайта тексеру жүргізіліп жатыр.
Жергілікті малшылар да кененің көбейіп кеткенін айтып дабыл қағуда. Олардың сөзінше, зиянкес жәндіктер төрт түлікке де үлкен зиян келтіріп жатыр.