Ел президенті дәстүрлі жыл сайынғы жолдауын халыққа жолдады. Бұл жолдауда 9 мәселені бөліп, жіліктеп тұрып айтты.
Маған әсіресе қатты ұнағаны — заң мәселесі. Заң мен тәртіпті іске асыруды қатаң тапсырды. Өйткені заң орындалмаған жерде, заң жұмыс істемеген жерде тәртіп те болмайды, ал тәртіпсіз салауатты, қуатты мемлекет құру өте қиын екендігін президент үнемі айтып келе жатыр.
Қаншама жылдан бері осыны ескертіп келеді. Әсіресе, осы жолы әр мәселені бөліп-жарып, жікке бөліп, әрқайсысына терең талдау жасап, сараптама жасағаны маған қатты ұнады. Әділетті Қазақстан, заң мен тәртіп, экономикалық өсім, қоғамдық тәртіп секілді мәселелердің бәрін талқылап өтті.
Халықтың ең өзекті мәселесі — қаржы өсімі, несие алу мәселесі. Өткен 30 жылдағы халықтың басынан кешкен қиыншылықтары қазір қоғамда ашық айтылып жатыр. Президенттің банк саласына қатысты жаңа заңның қажеттігін атап өтуі маған қатты ұнады. Уақыт соған алып келді.
Сонымен қатар, бюджет мәселесіне де ерекше тоқталды. Қаржыны орынсыз шашуға болмайтыны туралы нақты сараптама жасап, баса айтты. Енді бұл жолдау газеттерде жариялана бастайды. Біз баспасөзге шыққаннан кейін әр мәселенің өзектілігін терең түсініп, оны іске асыруды талап етеміз деп ойлаймын.