Кездесу барысында жастарға құқықтық сауаттылықтың маңызы түсіндірілді, деп хабарлайды aqshamnews.kz тілшісі.
«Заң мен Тәртіп» әлеуметтік жобасын іске асыру аясында Алматы қаласы Ішкі саясат басқармасының Қоғамдық даму орталығы Алматы мамандандырылған инновациялық лицейінің оқушыларымен кездесу ұйымдастырды.
Кездесудің негізгі мақсаты – жастар арасында заңға құрметті қалыптастыру, құқықтық мәдениет пен азаматтық жауапкершілікті арттыру, сондай-ақ «Заң мен Тәртіп» қағидатын кеңінен насихаттау.
Кездесуге спикер ретінде әл-Фараби атындағы Қазақ Ұлттық университеті заң факультетінің оқытушысы Дарханова Сандуғаш Дарханқызы және Алматы қаласы Полиция департаменті Есірткі қылмысына қарсы іс-қимыл басқармасының аса маңызды істер жөніндегі аға жедел уәкілі, полиция подполковнигі Көбеев Дәурен Асқарұлы қатысты.
Кездесу барысында жастарға құқықтық сауаттылықтың маңызы түсіндіріліп, заң талаптарын сақтау және қоғамдағы тәртіпті нығайту мәселелері талқыланды.