Қазақстан мен Норвегия арасындағы дипломатиялық қарым-қатынасқа – 30 жыл!
Бүгін, 6 маусым – Қазақстан-Норвегия ынтымақтастығындағы айтулы күн – екі ел арасында дипломатиялық қатынастардың орнағанына 30 жыл толып отыр, деп хабарлайды Almaty-akshamy.kz
Қазіргі таңда Қазақстанда Норвегия капиталының қатысуымен 17 кәсіпорын жұмыс істейді. Еліміздің экономикасына Корольдік тарапынан құйылған инвестициялар көлемі 164 млн доллар құрайды.
Норвегия – Қазақстанның Еуропадағы маңызды әріптестерінің бірі. Еліміздің Сыртқы істер министрлігі таратқан ақпаратқа сәйкес, тарихи тұрғыдан қысқа мерзім ішінде мемлекеттеріміз арасындағы сындарлы саяси диалог серпінді дамып, өзара тиімді сауда-экономикалық ынтымақтастық өрісі айтарлықтай кеңейді.
Елдеріміз халықаралық күн тәртібіндегі көптеген мәселелер бойынша ұқсас ұстанымда және БҰҰ, ЕҚЫҰ және басқа да халықаралық құрылымдар аясында тығыз ынтымақтастықта. Екі мемлекет халықаралық қауіпсіздікті қамтамасыз етуге де елеулі үлесін қосуда. Атап айтқанда, Корольдік Қазақстанда Атом энергиясы халықаралық агенттігінің қамқорлығымен Төмен байытылған уран халықаралық банкін құруды қолдаған мемлекеттер тобына қосылып, осы халықаралық бастаманың донорларының біріне айналған.
Екі тарап экономикалық ынтымақтастықты одан әрі кеңейту мақсатында кешенді жұмыстар атқаруда. 2021 жылдың қорытындысы бойынша 85 млн. АҚШ долларын құраған тауар айналымын жақын келешекте еселеу жоспары тұр.
Тараптар арасындағы мәдени-гуманитарлық байланыстарды дамытуға үлкен мән берілген. 2002 жылы ЮНЕСКО мен Норвегия мәдени мұра директораты бірлесіп Таңбалы петроглифтерін меңгеру, сақтау және таныстыру жобасын іске асырған болатын. Нәтижесінде, 2004 жылы петроглифтер ЮНЕСКО-ның Бүкіләлемдік мұралар тізіміне енгізілді.
Қазақстан мәдениетін әлемге паш ету жұмыстары аясында екі ел арасындағы ынтымақтастық тарихында алғаш рет Абайдың таңдаулы поэзиясы мен «Қара сөздері» норвег тіліне аударылып, шығарылды.
Екі елдің үкіметтері әлеуеті мол Қазақстан-Норвегия ынтымақтастығын одан әрі тереңдету және өзара тиімді әріптестіктің жаңа көкжиектерін игеру мақсатында бірлескен жұмыс аясын кеңейтуде.