World Boxing Азияда бокстың дамуы мен насихатталуын бақылау мақсатында жаңа Азия бокс конфедерациясының ресми түрде құрылғанын жариялады, деп хабарлайды aqshamnews.kz
Халықаралық бокс қауымдастығынан (IBA) Азия бокс конфедерациясының (ASBC) тәуелсіздігін қамтамасыз ету мәселесіне байланысты президенттік қызметінен кеткен Пичай Чунхавадзира жаңа ұйымның құрылуына және оның болашақтағы жұмысына толық қолдау білдіретінін айтты.
World Boxing Олимпиадалық комиссиясының төрағасы Геннадий Головкин жаңа конфедерацияның құрылуы Азия боксының әлемдік аренада ерекше орын алатындығын және бұл қадам спорттың дамуына жаңа серпін беретінін ерекше атап өтті:
«Мұндай жаңашыл құрылымды құруға қатысу – үлкен мәртебе. Бүгінде Азия боксы әлемдік аренада ерекше рөл атқарады. Жаңа конфедерация біздің аймақтың алатын орнын одан әрі бекітіп, осы спорт түрінің дамуына жаңа серпін береді», – деді ол.
Жаңа Азия конфедерациясының құрылуы құрлықтағы бокс саласының дамуына жол ашады. Ұйым тәуелсіздік, әділеттілік және спортшыларды қолдау қағидаттарын басшылыққа ала отырып, барлық мүдделі тараптарды ортақ мақсатқа біріктіреді.
Бұл қадам Азия боксының халықаралық деңгейде одан әрі күшті орын алуы мен Азия елдеріндегі жас боксшылардың дамуында жаңа мүмкіндіктер туғызатынына сенім береді.