Air Astana әуе компаниясы мен «Қазаэронавигация» республикалық мемлекеттік кәсіпорны арасында өзара ынтымақтастық туралы келісімге қол қойылды. Құжат екі саланың мамандары – ұшқыштар мен әуе қозғалысын басқаратын диспетчерлер арасындағы кәсібилікті арттыруға бағытталған.
Келісім аясында диспетчерлер ұшақ кабинасында бақылаушы ретінде ұшу мүмкіндігіне ие болады және авиатренажерлерде тәжірибеден өтеді.
Сонымен қатар, Air Astana ұшқыштары «Қазаэронавигация» орталықтарына барып, әуе қозғалысын басқару жұмысымен таныса алады. Бұл іс-шаралар екі тарап бір-бірінің қызметін тереңірек түсінуге, үйлесімділікті арттыруға және авиациялық қауіпсіздік пен ұшу тиімділігін жетілдіруге мүмкіндік береді. Құжатқа «Қазаэронавигация» РМК бас директорының бірінші орынбасары Фаат Богдашкин және Air Astana әуе компаниясының өндіріс жөніндегі атқарушы директоры Филиппос Сиаккас қол қойды. Іс-шара барысында тараптар БАҚ өкілдерінің сұрақтарына жауап беріп, болашақтағы бірлескен бастамалар мен жоспарларын бөлісті.
Сондай-ақ, спикер тәжірибе алмасу бағдарламасында экипаж жұмысын үйренуге арналған дәрістер де барын айтты. Диспетчерлер үшін өндірістік тәжірибе де қарастырылған. Сол сияқты, ұшқыштар да диспетчер жұмысымен танысады. Командир мен диспетчер ұшу кезінде бір-бірімен қалай байланыс орнатады, қандай мәселелер туындайды – осының барлығын меңгереді.
ТАҚЫРЫПҚА ОРАЙ
Фаат БОГДАШКИН, «Қазаэронавигация» РМК бас директорының бірінші орынбасары:
ӘУЕ ҚАУІПСІЗДІГІ: ЖАУАПКЕРШІЛІК ЖҮГІ ОРТАҚ
Бүгінгі қолға алынған бастама – Қазақстан Республикасының әуе кеңістігіндегі ұшу қауіпсіздігін қамтамасыз етуге арналған. Әуе қозғалысын басқаратын диспетчер мен әуе кемесін басқаратын экипаж бір-бірінің жұмысын жетік білуі қажет. Бұл келісімнің негізгі мәні осында. Осы мақсатта экипаж қатарында біздің диспетчеріміз де болмақ. Ол ұшақтағы командир мен екінші ұшқыштың жұмысымен танысады, қандай функцияларды орындайтынын, кабинадағы жұмыстарды көреді. Өйткені, диспетчер мен экипаж арасындағы байланыс үнемі үздіксіз жүреді: әуе кемесі тұрақта тұрған сәттен бастап, қозғалып, ұшып, қайта қонғанға дейінгі аралықты қамтиды.
Филиппос СИАККАС, Air Astana әуе компаниясының өндіріс жөніндегі атқарушы директоры:
МАҚСАТ – ӨЗАРА ӘРІПТЕСТІКТІ НЫҒАЙТУ
Әуе қозғалысының қауіпсіздігі диспетчер мен экипаждың өзара түсінісуі мен бірлесе жұмыс істеуіне тікелей байланысты. Диспетчерлерге әуе кемесінің кабинасында отырып, ұшқыштармен бірге ұшу және авиатренажерде тәжірибеден өту мүмкіндігі берілді. Олар ұшқыштардың жұмысымен танысып, әуе кемесін басқаруды түсінеді. Ұшқыштар да диспетчерлік орталықтарға барып, әуе қозғалысын басқару барысымен таныса алады. Бұл – екі тараптың шешім қабылдау тәсілін және бір-біріне қалай әсер ететінін жақсырақ түсінуге жол ашады. Мақсат – ұшу қауіпсіздігін арттыру және екі құрылым арасындағы өзара әріптестікті нығайту.