Осы жылдың желтоқсан айынан бастап жолаушылар арасында сұранысы жоғары бағыттар бойынша №101/102 «Астана–Алматы» және №111/112 «Астана–Шымкент» бағытындағы қосымша Тальго пойыздары қатынай бастайды.
Қосымша пойыздарға билеттерді жолға шығуға 45 күн қалғанда bilet.railways.kz сайтынан немесе вокзалдардағы «Жолаушылар тасымалы» АҚ кассаларынан сатып алуға болады. Пойыздардың «пакеттік» қозғалыс кестесі «DB E&C» компаниясымен бірлесіп жүзеге асырылып жатқан «Интермодальды тасымалдар – ХАБ жүйесі» жобасы аясында енгізіліп жатыр.
«Біз «Жолаушылар тасымалы» АҚ-мен бірлесіп, маршруттық желіні оңтайландыруға арналған инновациялық шешімдер әзірлеудеміз. Бұл жолаушыларға қызмет көрсету сапасын жақсартып, Қазақстанның ірі қалалары арасындағы қозғалыс жылдамдығын арттыруға мүмкіндік береді», – деді «DB E&C» компаниясының интермодальды тасымалдар бойынша бас директоры Николайс Сидоровс.
Сонымен қатар, жолаушыларға қолайлы жағдай жасау мақсатында ХАБ орталықтарында қала маңына қатынайтын және аралас көлік түрлерінің дамуы аясында жаңа теміржол маршруттық желісін құру мүмкіндігі де қарастырылуда.