Астанада бұрынғы әйелі мен үш баласын тұрып жатқан үйінен мәжбүрлеп шығарып жіберген ер адам қамалды.
Астаналық Дана Атешова бұрынғы күйеуі Марат Әйтеновтің полицейлермен және жеке сот орындаушылармен бірге үйіне келіп, балаларды бір-бірлеп үйден мәжбүрлеп шығарғанын, өзін соққыға жыққанын әлеуметтік желіде жариялаған, деп хабарлайды Almaty-akshamy.kz
Осыған орай Астана полициясы тергеу басталғанын мәлімдеді.
Марат Әйтенов — Шымкенттің бұрынғы әкімі Мұрат Әйтеновтің туған бауыры.
«Жеке сот орындаушылары үйден шығару туралы сот шешімін орындап жатқанда бұрынғы ерлі-зайыптының арасында жанжал туды. Күш қолдану дерегі бойынша Әйтеновке қатысты тергеу басталды. Тиісті сараптама тағайындалды. Соның нәтижесіне қарай процессуалды шешім қабылданады», - деді ведомстводағылар.
Бүгін адвокат Дамир Ишмаметов әлеуметтік желідегі парақшасында Марат Әйтеновтің қамауға алынғанын жеткізді.
Оның айтуынша, Әкімшілік кодекстің 73-бабы бойынша тергеу соты болады.
«Қылмыстық кодекстің 108-бабы, 1-бөлімі бойынша іс қозғалды. Мұнымен тоқтап қалмаймыз, күдіктінің әрекетінде өзге де қылмыстың белгілері бар, полициядан жаза қолдануын талап етеміз. Сондай-ақ ер адам әйелді ұрып жатқанда араласпай құр қарап тұрған полиция қызметкерлеріне қатысты қызметтік тергеу жүріп жатыр. Біреуі тіпті сот орындаушыларына көмектесіп, баланы жылаған күйі көтеріп сыртқа шығарып тастады», - дейді қорғаушы.
Қазақстанның бала құқықтары жөніндегі уәкілі Динара Зәкиева бала құқығының бұзылуына байланысты Бас прокуратурадан шара қолдануын өтініп ұсыным жолдаған.