Алматыда үш адамның өмірін қиған Әл-Фараби даңғылындағы жол апатына қатысты тергеу жалғасып жатыр, – деп хабарлайды aqshamnews.kz тілшісі.
Іс бойынша үш қылмыстық іс қозғалған.
Бірінші іс Zeekr көлігінің жүргізушісіне қатысты. Тергеу нұсқасы бойынша, ол мас күйде қарсы жолаққа шығып, Mercedes көлігімен соқтығысқан. Оған 7 жылдан 10 жылға дейін бас бостандығынан айыру жазасы тағайындалуы мүмкін. Іс сотқа жолданды, алдын ала тыңдау 28 мамырға белгіленген.
Екінші іс Алматы полиция департаменті басшыларының бірінің жүргізушісіне қатысты қозғалған. Ол қызметтегі әрекетсіздік бойынша күдікке ілінді. Бұл бап бойынша 7 жылға дейін бас бостандығын шектеу немесе айыру жазасы қарастырылған.
Үшінші іс мемлекеттік нөмірлердің заңсыз берілуі мүмкін деген дерекке қатысты тергеліп жатыр. Бұл бойынша 3 жылға дейін бас бостандығын шектеу немесе айыру жазасы көзделген.
Еске салайық, қайғылы оқиға 21 наурызға қараған түні Әл-Фараби даңғылы мен Мендіқұлов көшесінің қиылысында болған. Апаттан Mercedes жүргізушісі мен екі жолаушысы көз жұмды. Кейін әлеуметтік желіде жол апатына көше жарысы себеп болуы мүмкін деген болжам тарады. Осыдан кейін ІІМ Алматы полиция департаментінің бірқатар басшысын қызметінен босатып, қызметтік тексеріс бастады.