ҚР Еңбек және халықты әлеуметтік қорғау министрі Светлана Жақыпова Ұлытау облысына жұмыс сапары аясында өңір басшысы Дастан Рыспековпен кездесу және облыс активімен кеңес өткізді. Кездесулер барысында ведомство енгізген цифрлық шешімдерді қолдану есебінен әлеуметтік-еңбек саласындағы мемлекеттік қолдау шараларының тиімділігі мен атаулылығын арттырудың түйінді мәселелері талқыланды.
Облыс әкімімен кездесу барысында Мемлекет басшысының халықты жұмыспен қамту және әлеуметтік қолдау, кәсіпорындардағы еңбек қауіпсіздігі және еңбекті қорғау, өмір сүру сапасын арттыру және мүгедектігі бар адамдар үшін кедергісіз орта құру жөніндегі тапсырмаларын іске асыру мәселелеріне ерекше назар аударылды.
Активпен өткен кеңесте Светлана Жақыпова Еңбек министрлігі енгізген цифрлық құралдардың мүмкіндіктерін көрсетті. Атап айтқанда, ол мемлекеттік инвестициялардың тиімділігін арттыруға және сапалы жоспарлауға арналған жобалардың инновациялық навигаторы туралы егжей-тегжейлі айтып берді. Жүйе кадрларға деген қажеттілікті болжауға, инвестициялар көлемі, жобаларды іске асыру кезеңдері және жұмыс орындарын құру бойынша нақты көрсеткіштер туралы ақпарат алуға мүмкіндік береді.
«Осылайша, біз өңірлерге өз жобаларын іске асыруға және халықты нәтижелі жұмыспен қамтуды қамтамасыз етуге көмек көрсеткіміз келеді», – деп атап өтті Еңбек министрлігінің басшысы.
Отбасының цифрлық картасы (бұдан әрі – ОЦК) мемлекеттік органдарға мемлекеттік қолдауға мұқтаж қазақстандықтарды анықтауға және қажетті шараларды жедел қабылдауға, әлеуметтік саясаттың орта және ұзақ мерзімді міндеттері мен бағыттарын айқындауға мүмкіндік береді. Сондай-ақ, ОЦК азаматтардың әлеуметтік мәртебесіне байланысты кепілдендірілген мемлекеттік қолдаудың қандай да бір түрін алуға құқылы екендігі туралы күнделікті «электрондық хабарлама» болып табылады. Қазіргі уақытта Отбасының цифрлық картасы қазақстандықтарға қандай да бір өтініштерсіз жәрдемақылар мен әлеуметтік төлемдердің 11 түрін ресімдеуге мүмкіндік береді.
Бұл ретте ОЦК-мен ұқсас түрде Еңбек тәуекелдерінің цифрлық картасы әзірленді және енгізілді, бұл қызметкерлерге тиісті еңбек жағдайлары мен жалақы төлеуді қамтамасыз ету мониторингін жүргізуге, ықтимал еңбек жанжалдарына уақтылы ден қоюға және оларға жол бермеу жөнінде шаралар қабылдауға мүмкіндік беретін болады.
Еңбек министрлігінің басшысы осы және өзге де цифрлық шешімдер азаматтардың еңбек құқықтарын және мемлекеттік кепілдіктерге тең қол жеткізуді, халыққа қолдау шараларын көрсету кезінде ашықтық пен әлеуметтік әділеттілікті қамтамасыз етуге бағытталғанын атап өтті.