Көптеген елдерде кең таралған және балалар арасында танымал слаш сусынының құрамында зиянды заттар болуы мүмкін. Бұл сусын жеміс шырыны мен газды судан жасалып, оның үстіне мұз қосылады. Мұздың тез ерімеуін және десерттің дәмін сақтау үшін слашқа глицерин қосылады. Алайда, бұл балалар үшін өте зиянды болуы мүмкін, деп хабарлайды aqshamnews.kz
Ұлыбританияның Тағам стандарттары жөніндегі агенттігі 5 жасқа дейінгі балаларға слаш сусындарын бермеуді ұсынады. Ал 11 жасқа дейінгі балаларға күніне тек 1 стақаннан артық ішпеуге кеңес береді. Егер бұл нормалар бұзылса, бала ағзасында глицерин көбейіп, гипогликемияға (қанда глюкозаның күрт төмендеуі) әкеліп, тіпті естен тануға себеп болуы мүмкін. Ұлыбританияда осы жағдаймен 20-дан астам бала ауруханаға түскен.
Зерттеу нәтижелері Archives of Disease in Childhood журналында жарияланған. Балалар ауруханадан сауығып шыққаннан кейін слашқа жоламайтын болды.
Қазақстанда да мектеп жанындағы дүкендерде түрлі түсті және арзан тәттілер көп сатылады. Көбінесе санитарлық талаптар сақталмайды, бұл балалардың денсаулығына қауіп төндіреді. Ата-аналар балалардың не жеп жүргенін бақылап, олардың денсаулығына көңіл бөлуі маңызды.