Алматыда Ұлы Жеңістің 80 жылдығына арналған тарихи-рухани кездесу өтті
Алматы қаласындағы Орталықтандырылған кітапхана жүйесінің №4 кітапхана-бөлімшесінде Ұлы Жеңістің 80 жылдығына орай «Ұлы Жеңіске – мәңгілік тағзым» атты тарихи-рухани кездесу ұйымдастырылды. Бұл туралы Aqshamnews.kz сайты хабарлайды.
Жиынның негізгі мақсаты – соғыс ардагерлерінің естеліктері арқылы жастарға бейбіт өмірдің қадірін ұғындыру, отансүйгіштік пен азаматтық жауапкершілікке тәрбиелеу.
Кездесуге қатысқан соғыс және әскери қызмет ардагерлері өз өмірлерінен сыр шертіп, жас ұрпаққа адамгершілік пен елге қызмет етудің маңызын жеткізді. Даманск оқиғасының ардагері Оңғарбек Сыдықбеков жастарды қиын сәтте де адами қасиетті жоғалтпауға үндеді:
«Жастарды Отан сүйгіштікке, білімге тәрбиелеп, қандай жағдай болса да адамгершілікті жоғалтпауды үйрету керек», – деді ол.
Ауған соғысының ардагері Дуан Умаров та өз қызмет жолынан естелік айтып, ел үшін қызмет етудің қадірі туралы сөз қозғады:
«Бізде аталарымыздың артынан жүріп, басқа елге қызмет еттік. 1973 жылы Куба аралығында болдым», – деді ол.
Іс-шара барысында кітапхана қызметкерлері мен ұйымдастырушылар жастармен ашық диалог құрып, олардың ел тарихына деген қызығушылығын оятуға тырысты. Кездесу жас ұрпақтың бойына патриоттық рух пен ұлттық сана қалыптастыруға бағытталған мазмұнды әрі мағыналы шара ретінде өтті.
«Ұлы Жеңіске – мәңгілік тағзым» атты тарихи-рухани кездесу – батырлар ерлігі мен бейбіт өмірдің қадірін дәріптеуге арналған тағылымды шара болды. Мұндай кездесулер өскелең ұрпақтың елге деген сүйіспеншілігін арттырып, өткенге тағзым етіп, болашаққа жауапкершілікпен қарауға тәрбиелейді.