Халық – ұлық,
Тобыр – былық.
***
Тобыр көкжиектен әріні көрмейді,
Бірақ мінбені бермейді.
***
Халықта мін жоқ,
Тобырдың құрамында кім жоқ?!
***
Тобыр – құйын,
Тіл табысу қиын.
***
Тобыр – дүркіреген табын,
Арнасын бұзған ағын.
***
Тобырда жол көрсеткен көсем болмайды,
Отты қаузап-қаузап қоятын көсеу болады.
***
Отаныңнан қанша шақырым ұзасаң,
Сонша шақырым рухани жақындай түсесің.
***
Туған жердің табиғаты мен
өз табиғатың – бір табиғат.
***
Отанның серкесі – абыройлы,
Еркесі – бақытты.
***
Төзе берген Ел тозып тынады.
***
Елін сатқан – ез,
Жерін сатқан – жүлік.
***
Қимайтын бір құдірет – Елің,
Қинайтын бір құдірет – өлім.
***
Ұлтын сүймеген ұл –
Рухани құл.
***
Өмір дегеніміз – тұсау,
Өлім дегеніміз – бәрінен де босау.
***
Кейбір өмірден
Кейбір өлім қымбат.
***
Істеген жақсылығың
Өзіңнен кейін де өмір сүреді.
***
Ер – еліне,
Ел – жеріне тартады.
***
Есіру – ерлік емес,
Шегіну – жеңілу емес!
***
Елді сүйе білу аз,
Ел үшін күйе білу де керек.
***
Намыссыз халық – ынжық,
Құрып бітеді жүнжіп.
***
Әр үйден сәбидің үні шықпаса,
Ұлттан ұлы шықпайды.
***
Жарың қайда болса – ескі дертің,
Елің қайда болса – есіл-дертің сонда.
***
Үйдің іргесін азамат қалайды,
Кірпішін әйел қалайды.
***
Болмаса ұлттың көсемі,
Халықтың соры бес елі.
***
Кішкене халықтың ұлына
Үлкен жүрек керек.
***
Бір адамның дегенінен шықпаған халық –
Аузын жұмған балық.
***
Халық әдетте не жетпейтінін біледі,
Бірақ не істейтінін біле бермейді.
***
Замандастарынан асқан адам болған емес.
***
Дәстүр дегеніміз –
әдетке айналған үлгілі әрекет.
***
Дәстүр ойлауды емес,
Мойындауды керек етеді.
***
Өкіметке келгенше оппозиция жақсы,
Келгеннен кейін...
***
Оппозиция қалыңдық сияқты,
Оның кім екенін
ертең әйел болғаннан кейін білесің.
***
Халықты қорғамасаң қорғама,
Бірақ қорлама!
***
Халық көп,
Адам жалғыз.
***
Тобыр бар жерде – топ,
Жалғыздық бар жерде – ой бар.
***
Көңілді ортада – шарап,
Жалғыздық бар жерде – шер мен мұң.
***
Тобыр ештеңе шешпейді,
Бірақ елдің берекесін алады.
***
Отанын сатқан зұлымда
Сатылмайтын бірдеңе бар деп ойлайсыз ба?!
***
Озуды мақсат еткен ел
Шаң жұтып артта жүрмейді.
***
Ұлттың мықты болуы
Ұл-қыздарының жаппай мықты болуына
байланысты.
***