Ұлттық банк базалық мөлшерлемені 16,75%-ға дейін көтерді, деп хабарлайды Almaty-akshamy.kz ҚазАқпаратқа сілтеме жасап.
«Ұлттық банк базалық мөлшерлемені +/– 1 п.т. дәлізімен жылдық 16,75%-ға дейін көтеру туралы шешім қабылдады. Бұл шешім болжамдар мен нақты деректердің талдауына негізделді. Оған геосаяси жағдайдың белгісіздігі мен салдары, сондай-ақ әлемде азық-түліктің жоғары бағалары сақталып отырған сыртқы ортаның факторлары негіз болды», - делінген хабарламада.
Ұлттық банк базалық мөлшерлеменің қазіргі деңгейін жеткілікті жоғары деп бағалап отыр.
«Базалық мөлшерлемені ұзақ уақыт бойы бүгінгідей мәндерде сақтау инфляцияны тұрақтандыруға және оны орта мерзімді перспективада біртіндеп төмендетуге мүмкіндік береді»,- деп түсіндірді Банк.
Еске салсақ, 26 қазанда Ұлттық банк базалық мөлшерлемені 16%-ға дейін көтерген еді. Сонымен қатар ҰБ басшысы Ғалымжан Пірматов жыл соңына болжанып отырған инфляция мен ақша-кредит талаптарының бағалауларын ескергендерін, базалық мөлшерлеменің тағы да мүмкін екенін айтқан еді.