Кенжемұрат Қасенов, Үлкен ауылдық округінің әкімі:
Президенттің Қазақстан халқына биылғы Жолдауында атап көрсетілгендей, АЭС салу бойынша референдум 6 қазанда өтетін болып белгіленді. Бұл ел үшін стратегиялық маңызы бар нысанның құрылысын жүргізуге Абай облысындағы Курчатов қаласы мен Алматы облысындағы Үлкен ауылы қарастырылып отыр. Аймақты таңдаудың да өзіндік себептері бар. Атом электр стансасындағы реакторларды салқындату үшін мол су қоры қажет. Осы себепті Ертіс өзенінің бойында орналасқан Курчатов қаласы мен Балқаш көлінің жағалауындағы Үлкен ауылы таңдалды.
Үлкен ауылы Қонаев қаласынан 330 шақырым қашықтықта орналасқан, мұнда үш мыңға жуық халық тұрады. Бұрын бұл аймақ құрылысы қайнап тұрған, қалада тіршілік қыз-қыз қайнап, көптеген үйлер салынып жатты. Бүгінде кейбір үйлер қаңырап бос қалған. Бірақ, АЭС салынатын болса, Үлкен ауылының болашағы жарқын болады деп сенемін.
Бұл ауыл 1980 жылы жоспарланып, 1984 жылы құрылыс басталған. Бастапқыда бұл аймақ Оңтүстік Қазақстан ГРЭС-ін салуға негізделген шағын қалашық ретінде құрылған болатын. Сол кезде мұнда жастарға жұмыс болатын. Қазір жұмыс орындары азайғандықтан, көптеген тұрғындар үлкен қалаларға қоныс аударды. Дегенмен, АЭС құрылысы жүзеге асса, ауылымызға сол азаматтар қайта оралып, жаңа мүмкіндіктер ашылады деп үміттенеміз.