Үлкен Алматы көліне баратын жолда көлік қатынасына шектеу қойылды, – деп хабарлайды aqshamnews.kz тілшісі.
Өңірлік коммуникациялар қызметінде өткен баспасөз конференциясында Іле-Алатау мемлекеттік ұлттық табиғи паркінің Медеу бөлімшесіне қарасты Үлкен Алматы орманшылығының маманы Мұрат Рысқұл осылай деді.
Іле-Алатау мемлекеттік ұлттық табиғи паркінің аумағында қазір 46 туристік бағыт бар, оның 38-і жұмыс істеп тұр. Ақсай, Медеу, Түрген мен Талғар бөлімшесі болып бөлінген оған жаяуларға, автокөлікке, атпен және велосипедпен жүруге арналған бағыттар кіреді. Спикердің айтуынша, жазда тауға келетіндер күрт көбейетіндіктен, бақылауды күшейтуге тура келіпті.
«Біз жыл сайын жазғы кезеңде туристік бағыттарды бақылауды күшейтеміз, себебі келетіндер көп. Барлық қолданыстағы бағыттар паспортталған және мемлекеттік инспекторлардың бақылауында. Негізгі міндет — туристердің жайлы әрі қауіпсіз демалысын қамтамасыз ету», — дейді Мұрат Рысқұл.
Ең көп сұранысқа ие бағыт Медеу бөлімшесінде орналасқан, мұнда барлық 19 бағыт жұмыс істейді. Қалғандарында кейбір бағыттар әртүрлі себеппен уақытша жабылғанымен, негізгі туристік нысандар сол күйі ашық тұр екен.
Үлкен Алматы көліне апаратын бағыт адам ең көп баратын орынның бірі. Мұнда жеке автокөліктердің, мототехниканың, сондай-ақ электр самокаттар, электр велосипед пен басқа да ұқсас құралдардың жүруіне тыйым салынған.
«Көлге апаратын жол күрделі тау бедері арқылы өтеді: тік еңісті, көріну мүмкіндігі шектелген, тас құлау қаупі бар учаскелер бар. Көліктің әртүрлі түрі араласып кеткенде жол апаты жиілеп кетуі мүмкін. Жалға алынған электр көліктері де осындай жағдайға жиі тап болады», — дейді спикер.
Тексеру барысында туристердің электробайкпен нұсқаушысыз жүріп, жолдан шығып кетіп, табиғи жамылғыға зиян келтіргені анықталыпты.
«Мұндай жағдай адамның өзіне ғана қауіп төндірмей, экожүйеге де зиян тигізеді. Сондықтан уәкілетті органдармен бірлесіп, бақылауды күшейтіп, рейдтік іс-шаралар мен кезекшіліктер енгіздік. Бұл — тек қауіпсіздік мақсатында қабылданған мәжбүрлі іс-шара», — деп атап өтті Мұрат Рысқұл.
Жалпы алғанда, ұлттық паркте кешенді жұмыстар жүргізіліп жатыр екен: маршруттарда инспекторлар сақшылық қызмет атқарады, туристерге түсіндіру жұмысын жүргізеді, ақпараттық белгілер мен көрсеткіштер орнатылады, төтенше қызметтермен бірлесіп істеу де жолға қойылған.
«Демалысты шектеу емес, оны қауіпсіз ету мақсатымыз. Жұрт табиғатта еркін демалып, парк қауіпсіз болып қалуы тиіс», — дейді Мұрат Рысқұл.