Ұландықтар саяси маңызды күнде тыс қалмады. Қазақстан Республикасы Ұлттық ұланы «Оңтүстік» өңірлік қолбасшылығы басқармасының ұжымы тікелей эфирден онлайн форматта Президент Жолдауын тыңдады.
«Оңтүстік» өңірлік қолбасшылығының қолбасшысы генерал-майор Талапкер Әміреевтің басшылығымен басқарманың офицерлері мен әскери қызметшілері мәжіліс залына жиналып, Қазақстан Республикасы Президентінің «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауын тыңдап, өз қолдауларын білдірді.
Бүгінгі Жолдауда, Қазақстан Республикасы Қарулы Күштерінің Жоғарғы Бас қолбасшысы қоғамда заң мен тәртіп идеологиясын терең орнықтыру қажетілігін атап өтті. Сонымен қатар әскери құрылымдардағы тәртіпке де басты назар аударды.
«Әскер қатарында заң мен тәртіптің сақталуы – айрықша маңызды міндет. Жастар әскерге Отан алдындағы борышын өтеуге барады. Жас сарбаздарымыз өз міндетін алаңсыз орындауы үшін әскер қатарында, ең алдымен, темірдей тәртіп болуға тиіс. Қарулы күштер мен басқа да күштік құрылымдар осы талапты мүлтіксіз орындауы қажет. Әр ата-ана әскерге кеткен баласын мемлекетке сеніп тапсырады. Сондықтан сарбаздардың денсаулығы мен қауіпсіздігіне, ең алдымен, армия басшылығы және құқық қорғау мекемелерінің басшылары жауапты», – деді Мемлекет басшысы.
Жолдаудан кейін «Оңтүстік» өңірлік қолбасшылығының қолбасшысы генерал-майор Талапкер Әміреев басқарма жеке құрамына Президенттің жүргізіп отырған саясатының маңыздылығын жалпылама түсіндіріп, оны жүзеге асыруда басқарма басшыларына бірқатар тапсырмалар қойды.
– Тоғыз бағыттан тұратын бұл Жолдау қазіргі жағдайда алдымызда тұрған басты міндеттерді шешуде негізгі рөл атқарады деп сенемін. Алдағы уақытта, барлық әскери бөлімдерде Жолдауды жан-жақты түсіндіру жұмыстары жүргізілетін болады. Мемлекет басшысының жолауына қолау білдіре отырып, құқықтық тәртіп әскерінің жеке құрамы да аталған міндеттерге жету үшін табанды еңбек ететініне сенім білдіремін, – деп атап өтті генерал-майор Талапкер Әміреев.
Мемлекет басшысының Жолдауын жүзеге асыру мақсатында өңірлік қолбасшылыққа қарасты барлық әскери бөлімдерде тиісті шаралар өткізілетін болады.
Айта кетейік, мұндай іс-шара қолбасшылыққа қарасты барлық әскери бөлімде де ұйымдастырылды.