Қазақстан Республикасы Ұлттық ұланының Алматы қаласында орналасқан 5571 әскери бөлімінің жауынгерлері Қонаев қаласының жағажайында пышақ алып жүрген ер адамды құрықтады.
Оқиға 27 тамызда кешкі сағат 18.10 шамасында болған. Қызметте жүрген әскери жасаққа жас жігіт келіп «Маями» демалыс орнының аумағында қолында пышағы бар ер адам тұрғындарға балағат сөздер айтып жүргені туралы хабарлаған.
Оқиға орнына келген әскери жасақ бастығы қатардағы Нұрайдар Батырбай, патрульші жауынгерлер қатардағы Нұрлыбай Әбжаппар мен Досымжан Құралбек қоғамдық тәртіпті бұзып, өзін агресивті ұстаған азаматты байқайды. Ол сол маңдағы адамдарға қоқан-лоқы көрсетіп, тіл тигізген. Қорғаныстың түрлі әдіс-тәсілдерін меңгерген жасақ шапшаң әрекет етіп, бұзақының қолындағы пышағын қағып жіберген, іле қолын артқа қайырып, күдіктіні тырп еткізбеді. Ал қолындағы ас үй пышағы тәркіленді.
“Біз өзін агрессивті ұстап, адамдарға балағат сөз айтып жүрген ер азаматты байқадық та, соған қарай бардық. Ол қолындағы пышағын жалаңдатып, жан-жағына сілтей бастады. Өзіне ешкімнің жақындамауын талап етіп, балағат сөздер айтып айқайлады. Біз дереу ол азаматты қолға түсіру үшін әрекет жасадық, себебі ол айналасына қауіп төндірді. Жекпе-жек ұрысының тәсілдерін пайдаланып ақыры біз оны ұстадық”, - дейді қатардағы Нұрайдар Батырбай.
Ұлттық ұлан сарбаздары 1985 жылы туған адамды одан әрі тексеру үшін Қонаев қаласы ІІБ полиция қызметкерлеріне табыстады.