Ұлы Отан соғысына кеткен жерлестеріміздің сүйегі табылып жатыр
Екінші дүниежүзілік соғыс кезінде қаза болған жүзден астам қазақстандық жауынгердің сүйек қалдықтары Харьков облысынан табылды, деп хабарлайды Almaty-akshamy.kz Qazaqtv.com cайтына сілтеме жасап.
Сарапшылар оларды 1942 жылы осы аймақта қанды қақтығыс кезінде ерлікпен көз жұмған «106-шы Ақмола» атты әскери дивизияның сарбаздары болуы мүмкін деп отыр.
Қазіргі таңда Харковьта еліміздің арнайы іздестірушілер тобы жұмыс істеп жатыр. 5 жылдан астам осы өңірде іздеу жұмыстарын жүргізіп келе жатқан украиналық әріптестер 500-ге жуық әскердің сүйегін қазып алған екен. Дегенмен әлі күнге дейін марқұмдардың есімдері анықталмаған.
Сондай-ақ, Украина түбінде ұрысқа қатысқан көптеген жауынгердің ұрпақтары бүгінде Ақмола облысында тұрады. Олар ата-бабаларының мәйіттерін туған жеріне алып келіп, қайта жерлеуге болады деп үміттеніп отыр. Сонымен қатар бұл экспедиция Украинада жүргізілген еліміздің тарихи-мұрағаттық жобасының бірінші кезеңі болмақ.
«Іздеу жұмыстары кезінде ауқымды істің бір ғана бөлігін қамтыдық. Негізгі жұмыстың өзегіне әлі жеткен жоқпыз. 350 әскер ғана емес, он мыңдаған адамның сүйегі жатыр. Солардың жеке заттарынан бастап кім екенін анықтауымыз қажет. Алдағы уақытта украиналық әріптестерімізбен бірігіп мемориалды аймақ құрғымыз келеді», - деді «Мемориалды аймақ» іздеу жасағының командирі Майдан Құсайынов.