25 маусымнан бастап тіркелмеген смартфондар өшіріле бастайды, деп хабарлайды aqshamnews.kz
24 наурыздан бастап Қазақстанда смартфондарды тіркеудің жаңа ережелері күшіне енді. Мемлекет телефон сатушыларына тауарларын заңдастыру үшін бір ай уақыт берсе, енді дәл осындай мерзім құрылғы иелеріне де беріледі. Жаңа ереже арқылы мемлекет көлеңкелі нарықпен күреске азаматтарды да тартуды көздеп отыр. Себебі кеден қызметі контрабандамен күресте тиімді нәтиже көрсетпей келеді.
– Сарапшылардың бағалауынша, елімізде сатылып жатқан смартфондардың шамамен 75 пайызы – «көлеңкелі» тауарлар. Бұл құрылғылар Қазақстан аумағына заңсыз әкелініп, тіркеусіз қолданылуда. Соның кесірінен бюджет жыл сайын 70-80 миллиард теңге салықтан қағылып отыр, – деді ОКҚ-де өткен брифингте цифрлық даму министрлігінің телекоммуникациялар комитетінің төрағасы Дамир Сейсембеков.
Мәселені шешу үшін смартфондарды тексеруге арналған бірыңғай цифрлық инфрақұрылым құрылған.
Бұған дейін цифрлық даму, инновациялар және аэроғарыш өнеркәсібі министрлігі Қазақстанда ұялы телефондарға IMEI-код тіркеу не үшін енгізілгенін және жаңа телефондардың импорттайтындардан төлем не үшін алынатынын түсіндірген болатын.