Алматы қаласы бойынша ҚАЖ департаментіне қарасты №11 мекемесінде “Азаматтардың құқығын қорғау және қазіргі қоғамдағы құқықтық мәдениет деңгейін арттыру — әлеуметтік тұрақтылық пен құқықтық тәртіпті қамтамасыз етудегі басты рөлі” жобасы аясында “Кәмелетке толмаған сотталғандар не білуі керек?” деген тақырыпта тренинг өтті.
Бас бостандығынан айырылған жастарға ҚР Президенті жанындағы Ұлттық құрылтай мүшесі, Әйелдер істері және отбасылық-демографиялық саясат жөніндегі Ұлттық комиссия төрағасының орынбасары Айман Омарова, “Human Rights Lawyers" қоғамдық қорының президенті, заңгер Ләззат Рақышева, Алматы қалалық адвокаттар алқасының адвокаты Ғалымжан Жолдасбаев және басқа да құқық саласының мамандары кеңес берді. Аяғын жаза басқан жасөспірімдерге адвокаттар рақымшылық туралы заңды түсіндірді, балалар қойған сұрақтарға жауап берді.
Белгілі адвокат Айман Мұратқызы балаларды бостандыққа шыққаннан кейін дұрыс жүріп-тұруға, өмірін жақсы жағына өзгертуге ұмтылуға, заңсыз істермен айналыспауға, Телеграм каналы арқылы өзіне тартатын алаяқтарға алданбауға, кәсіп меңгеруге шақырды.
