Алматыда полиция күштерінің сап түзеуі өтті
Алматыда полиция күштерінің сап түзеуі өтті, деп хабарлайды Аlmaty-akshamy.kz Polisia.kz сайтына сілтеме жасап.
Шараға патрульдік полиция полкінің, мамандандырылған батальонның нарядтары, жылдам қимылдайтын арнайы жасақтың қызметкерлері қатысты,
Саптық байқаулар әрбір полиция қызметкерінің келбеті жинақы және ұқыпты болуы үшін, қызметкерлердің киім кию ережелерін сақтауы үшін өткізіледі.
Қалалық полиция департаментінің бастығы Арыстанғани Заппаров жапсырмалар мен эмблемалардың дұрыстығына, қызметтік куәлікке, шаш үлгісі мен тиісті аяқ киімнің болуына, сондай-ақ автокөлік пен техникалық құралдардың жай-күйіне ерекше назар аударды.
«Қаладағы тәртіп пен азаматтардың қауіпсіздігі полицияның қалай жұмыс істейтініне байланысты. Тәртіп сақшыларының қоғаммен тығыз байланыста болуы өте маңызды. Ал материалдық-техникалық база мен мемлекеттік әлеуметтік қолдау сіздерге қылмысқа қарсы тұруға мүмкіндік береді», - деп атап өтті Арыстанғани Заппаров.
Сонымен қатар саптүзеуде қызметкерлер түрлі құқық бұзушылықтар бойынша бағдарларды және командирлердің нұсқауларын тыңдады.
Ведомстволық талаптарға сәйкес, полицияда саптық байқаулар жазғы және қысқы киім нысанына көшу кезінде, яғни жылына екі рет өткізіледі. Бұл жеке құрамның құқықтық тәртіпті қамтамасыз ету, қылмысқа қарсы күрес және азаматтардың құқықтарын қорғау жөніндегі міндеттерін орындауға дайындығын тексеру үшін қажет. Өңірлерде мұндай саптық байқаулар ауа райына байланысты әртүрлі уақытта өтеді.
Әрбір полиция қызметкерінің келбеті жинақы және ұқыпты болуы керек. Қызметкерлер киім кию ережелерін сақтауы тиіс. Себебі тәртіп осыдан басталады.