«Neke tour» республикалық байқаудың жеңімпаздары – ерлі-зайыпты он бес жұп неке қию үшін Қазақстанның рухани астанасы Түркістанға жолдама алады. Сонымен қатар жеңімпаздар құрметіне романтикалық кешкі ас, фотосессия және мәдени бағдарлама ұйымдастырылады, деп хабарлайды Аlmaty-akshamy.kz
Неке қию – қазақ халқында кең қолданыс тапқан, шариғат жолымен орындалатын дәстүр. Сан ғасырдан бері бұл дәстүр берік некенің кепілі болып келді. Жастар бір кеседен неке суын ішіп, адал болуға ант беретін. Осылайша ата-бабаларымыз ізгі ниет және қос жүректің қалауымен екі жастың басын қосқан.
Түркістанда осынау әдемі дәстүр жанданып жатыр. Open Turkistan туристік-ақпараттық орталығы Түркістан облысының Мәдениет және туризм басқармасымен бірлесіп, ерлі-зайыптылар арасында өтетін «Neke tour» байқауын жариялады. Байқау «Shanyraq», «Махаббат», «Ару» және «Жанұя» атты 4 номинация бойынша өтеді.
Байқау шарттары бойынша, 3-9 сәуір аралығында ерлі-зайыпты жұптар neke-turkistan.kz порталы арқылы қатысуға онлайн-өтінім жолдады. Енді байқау комиссиясы Түркістанға барып, неке қию рәсімін өтіп, сондай-ақ тақырыптық фотосессияға қатыса алатын 15 жұпты анықтауы керек. Жеңімпаз жұптар үшін қосымша тегін рейс, қонақүй және романтикалық кешкі ас ұйымдастырылады. Сондай-ақ, жас жұбайларға Түркістанның көрікті жерлерін аралап, қала бойынша тегін экскурсия ұйымдастырылады.
Байқау ұйымдастырлған кезеңде қатысуға Қазақстанның барлық өңірінен дерлік 345 жұп өтінім қалдырды.
«Байқау туралы біліп, көптеген ерлі-зайыпты жұп қатысуға өтінім жібергеніне қуаныштымыз. Мұндай белсенділік жастардың өз халқының мәдени және рухани құндылығына деген құрметі, сол салт-дәстүрмен өмір сүруге деген құлшынысы байқалады. Неке қию рәсімінің қасиетті мән-мағынасы баянды әрі бақытты отбасылық өмірге жақсы негіз болады», – дейді ұйымдастырушылар.
«Neke tour» байқауының жеңімпаздары Қазақстанда XIII–XIV ғасырлардағы қазақ эпосының кейіпкерлері – Қозы Көрпеш пен Баян Сұлуға арналған ғашықтар күні 15 сәуірде жарияланады. Байқау нәтижесі ұймдастырушының @_openturkistan_ парақшасында жарияланады