Түркістанда Наурыз мерекесі ерекше түрде аталып өтілді. Наурыздың дәстүрлі тағамы – наурыз көже бұл жолы үлкен ауқымда дайындалып, 2,5 тонна көже әзірленді. Аспаздық өнер мен ұлттық тағамдарды дәріптеу мақсатында дайындалған наурыз көжесіне 250 келі ет пен 1 тонна дәнді дақыл қосылған, деп хабарлайды aqshamnews.kz
«Негізі наурыз көже жеті түрлі дәмнен жасалады. Біз бірақ дәмі ерекше болуы үшін сегізінші дәм ретінде құрт малтасын қостық», – дейді көже дайындаушылар.
Бұл ерекше көженің дайындалуы 24 сағатты қамтыған және 250-300 литрлік 12 қазанға пісірілген.
Наурыз көже қала тұрғындары мен қонақтарына 150 теңгеден сатылды. Ұйымдастырушылардың айтуынша, жиналған қаражат балалар үйіне қайырымдылық ретінде беріледі. Кешеннің ішіне толып кеткен халықтың көңілі көтеріліп, наурыз мерекесі нағыз ұлттық салт-дәстүрді паш етуге мүмкіндік берді.
«Керуен Сарай» кешенінің іші иін тірескен халыққа лық толды, бұл да мерекелік шараның үлкен танымалдылығын және халқымыздың дәстүрлерге деген құрметін көрсетеді. Ұлттық тағамдарды дәріптеу, халықтың бірлігін нығайту мақсатында ұйымдастырылған бұл іс-шара Наурыз мерекесінің мағынасын терең сезінуге мүмкіндік берді.