Түркістан облысында полицейлер Қазығұрт ауданында мал ұрлығымен айналысқан топты қолға түсірді. Күдіктілердің әрекетінен жергілікті тұрғынға шамамен 5 млн теңге шығын келген, – деп хабарлайды aqshamnews.kz тілшісі.
Түркістан облысында Полиция департаментінің криминалдық полиция басқармасы мен Қазығұрт аудандық полиция бөлімінің қызметкерлері мал ұрлығына қатысы бар топты ұстады.
ІІМ мәліметінше, полицияға жергілікті тұрғын арызданған. Оның айтуынша, белгісіз адамдар 20-дан астам қойы мен сиырын ұрлап кеткен. Келтірілген шығын көлемі шамамен 5 млн теңгені құраған.
Осы қылмысты ашу үшін полицейлер жедел-тергеу шараларын жүргізіп, жиналған айғақтарды саралаған. Нәтижесінде 20 мен 35 жас аралығындағы бес күдікті анықталып, ұсталды.
Тінту кезінде күдіктілердің бірінің үйінен 17 бас қой мен бір сиыр табылып, тәркіленді. Тергеу мәліметінше, ұрланған малдың бір бөлігі базарда сатылып кеткен. Ал одан түскен ақшаны күдіктілер өз қажетіне жұмсап үлгерген.
Қазір күдіктілер қамауға алынды. Аталған дерек бойынша сотқа дейінгі тергеп-тексеру амалдары жүріп жатыр. Полиция оқиғаның барлық мән-жайын анықтау жұмыстарын жалғастыруда.