Доллар мен мұнайдың құбылуы салдарынан жанармайдың литрі біздің ақшаға шаққанда 680 теңгеден саудаланып жатыр.
Инфлияцияның өсуі тұрғындардың қалтасын қақты. Үкімет, шұғыл іс-қимыл жоспарын дайындаймыз - деп отыр, деп хабарлайды Almaty-akshamy.kz 24.kz-ке сілтеме жасап.
Үш ай бұрынғы саяси дода алдындағы бензин 19,81, дизель бағасы 18,59 лира болатын. Ал қазір бензин 38,23 дизель 38,87 лира. Елде жанармай бағасының соңғы айларда қымбаттауы тасымалға, ал тасымалдың қымбаттауы барлық салаға әсер етті.
Хакан Эмар, тұрғын: - Өкінішке орай, бұл жағдай қалтамызды қақты. Тасымалдың өзіне табысымыздың бір бөлігін жұмсаймыз. Доллардың да қымбаттауы, барлық тауарлардың бағасының өсуіне алып келді. Соның ішінде, машина бөлшектері бірнеше күнде 30-40% артқанын көріп көңіліміз түсті. Қазір айналадағы таныстарымыздың бәріміздің әңгімеміз осы бензин бағасы. Тұрмысымызға тікелей әсер етіп отыр.
Елде шілде айында көп салада еңбекақы көбейгенімен ақшаның құны күн сайын төмендеп жатыр, дейді тұрғындар.
Жафер Эр, тұрғын: - Бензиннің қымбаттауы адамдардың 60-70% тікелей әсер етеді. Менің екінші жұмысым лифтілерді жөндеу. Қала ішінде көлікпен жүргендіктен біздің қызмет ақымыз да автоматты түрде қымбаттады.
Түрік билігі, инфляциямен күресті күшейтті. Қыркүйек айында үкімет орта және қысқа мерзімді іс- қимыл жоспарын ұсынбақ.
Жевдет Йылмаз, Түркия вице-президенті: - Инфляцияға қарсы күресті табанды түрде жалғастырамыз.Екіншіден рецессияға ұшырамай, еліміздің тұрақты дамуын көздейміз.
Бензиннің қымбаттауы қоғамдық көлік пен такси қызметінің тарифіне де әсер етті. Ыстамбұл мен Анкарада автобуста жүру құны біздің ақшамен есептегенде 255 теңгеден басталады.