Алматыда Қазақстандағы Түркия Түлектері Қауымдастығының ұйымдастыруымен «Түркия Түлектері Кездесуі – Алматы 2024» іс-шарасы өтті. Жиынға Түркияда әр жылдары білім алған қазақстандық түлектер қатысты.
Іс-шараға Түркия Республикасының Қазақстандағы Елшісі Мұстафа Капуджу, Түркияның шетелдегі түріктер және туыстас қауымдастықтар басқармасының (YTB) басшысы Абдуллах Ерен, Алматыдағы Бас консулы Эврен Мүдеррисоғлу арнайы келіп, сөз сөйледі.
Спикерлер Қазақстаннан барған студенттердің білімге құштарлығы мен табандылығын ерекше атап өтіп, олардың екі ел арасындағы бауырластықты нығайтуға қосқан үлесін жоғары бағалады. Сондай-ақ, бұл іс-шараның Қазақстан мен Түркия түлектері арасындағы байланысты күшейтіп, екі елдің достық қарым-қатынасын одан әрі дамытуға зор ықпал ететінін жеткізді.
Кездесу түлектер үшін тәжірибе алмасып, ортақ жобаларды талқылауға мүмкіндік берген маңызды алаң болды.