Қазақстанда кейінгі 6 жылда қанша үй бой көтеріп, баспана пайдалануға берілді? Өңірлік көрсеткіш қандай? Аqshamnews.kz бұл сұрақтардың жауабын білу үшін Өнеркәсіп және құрылыс министрлігіне арнайы сауал жолдады.
Министрлік мәліметінше, 2019-2024 жылдары елімізде тұрғын үй құрылысы тұрақты өсім көрсетіп, барлығы 97,9 млн шаршы метр немесе 871,4 мың пәтер ел игілігіне тапсырылды. Бұл кезеңде мемлекеттік бағдарламалар аясында әлеуметтік осал топтар, жастар және кредиттік тұрғын үйге мұқтаж отбасылар баспанамен қамтылды. Сонымен қатар, тұрғын үй құрылысына тартылған инвестиция көлемі 15,4 трлн теңгеден асқан.
Тұрғын үй құрылысының жалпы көрсеткіштері:
Кейінгі алты жыл ішінде пайдалануға берілген тұрғын үй көлемі жыл сайын оң көрсеткіш көрсетіп келеді:
-
2019 жыл – 13,1 млн ш.м. (115,3 мың пәтер);
-
2020 жыл – 15,3 млн ш.м. (139,1 мың пәтер);
-
2021 жыл – 16,9 млн ш.м. (149,5 мың пәтер);
-
2022 жыл – 15,7 млн ш.м. (133,2 мың пәтер);
-
2023 жыл – 17,8 млн ш.м. (160,4 мың пәтер);
-
2024 жыл – 19,1 млн ш.м. (173,9 мың пәтер) берілген.
Мемлекеттік бағдарламалар аясында қанша тұрғын үй тапсырылды?
1. Әлеуметтік жалға берілетін үйлер:
2019-2024 жылдары 77 357 пәтер салынып, сатып алынды. Оның ішінде жұмыс істейтін жастар үшін – 12 536 пәтер.
- 2019 жыл – 14 428 пәтер,
- 2020 жыл – 9 534 пәтер,
- 2021 жыл – 12 159 пәтер,
- 2022 жыл – 6 534 пәтер,
- 2023 жыл – 13 657 пәтер,
- 2024 жыл – 21 045 пәтер.
2. Кредиттік тұрғын үйлер:
78 031 пәтер салынды.
3. Жеңілдетілген ипотекалық бағдарламалар:
Отбасы банк арқылы 2% мөлшерлемемен – 22 022 қарыз, 5% мөлшерлемемен – 58 450 қарыз берілді.
4. Жеке тұрғын үй құрылысына жер:
183,4 мың жер учаскесі инфрақұрылыммен қамтамасыз етілді.
Өңірлік көрсеткіштер
Республика көлемінде ең жоғары құрылыс көлемі
- Астана (15,15 млн ш.м., 162 мың пәтер)
- Шымкентте (12,96 млн ш.м., 146,3 мың пәтер) тіркелді.
- Алматы қаласында – 10,66 млн ш.м. (98,6 мың пәтер),
- Маңғыстау облысында – 5,15 млн ш.м. (37,1 мың пәтер),
- Атырау облысында – 5,0 млн ш.м. (37,3 мың пәтер) пайдалануға берілді.
Кейбір облыстарда жылдар аралығында айтарлықтай өсім байқалды. Мәселен, Солтүстік Қазақстан облысында 2022 жылдан кейінгі үш жылда жылдық көрсеткіш бірнеше есе артқан.
Инвестициялар
2019-2024 жылдары тұрғын үй құрылысына салынған инвестиция көлемі 15,4 трлн теңге болды.
Жылдар бойынша бөлініс:
-
2019 – 1 475,5 млрд тг
-
2020 – 1 989,3 млрд тг
-
2021 – 2 434,3 млрд тг
-
2022 – 2 902,2 млрд тг
-
2023 – 3 067,2 млрд тг
-
2024 – 3 542,4 млрд тг
Қазір қанша құрылыс компаниясы тіркелген?
Министрлікте тіркелген компаниялар санына қатысты мәліметтер жоқ. Дегенмен, "e-license" порталының деректеріне сәйкес, қазіргі уақытта құрылыс-монтаж жұмыстарын жүргізуге берілген қолданыстағы лицензиялардың саны:
-
1-санат – 4 337 лицензия;
-
2-санат – 13 731 лицензия;
-
3-санат – 39 232 лицензия берілген.
Бес жылдағы өзгерістер
2025 жылы экономикалық өсімді қолдау мақсатында 19,2 млн шаршы метр тұрғын үйді (170 мыңнан астам пәтер) пайдалануға беру жоспарланып отыр.