«Қазгидромет» болжамынша еліміздің 14 облысында және Астанада ауа райына байланысты қауіп күшеймек. Сондықтан елде дауылды ескерту жарияланды, деп хабарлайды Aqshamnews.kz тілшісі.
Сәрсенбі күні ел аумағында қыс мінез көрсетпек. Бір өңірде ақтүтек боран соқса, енді бір аймақты қалың тұман басады. Қар мен көктайғақ жол қозғалысын қиындатып, желдің екпіні кей жерде секундына 28 метрге дейін жетуі мүмкін.
Солтүстік пен шығыс өңірлерде қар аралас боран күшейеді. Павлодар, Солтүстік Қазақстан, Ақмола, Қарағанды облыстарында бұрқасын соғып, түнгі уақытта жел екпіні айтарлықтай артады. Кей аймақта қардың салдарынан көріну қашықтығы төмендейді. Бұл аймақтарда ауа температурасы –10–18 градус шамасында болады.
Шығыс Қазақстан мен Абай облыстарында да ауа райы күрделі. Мұнда қар жауып, бұрқасынмен қатар көктайғақ қалыптасады. Түнде соққан қатты жел тұрғындарға қосымша қауіп төндіруі мүмкін. Өңірде сынап бағанасы – 15–25 градусқа дейін төмендейді.
Батыс өңірлерде жағдай біршама басқаша. Атырау, Батыс Қазақстан, Маңғыстау облыстарында тұман түсіп, жолдар тайғақ болады. Кей жерде жел күшейіп, көлік қозғалысына кедергі келтіруі ықтимал. Күндізгі ауа температурасы –3 –8 градус, түнде –10 градусқа дейін салқындауы ықтимал.
Оңтүстікте, әсіресе Түркістан облысының таулы аудандарында тұман күтіледі. Тау асуларында желдің екпіні артып, жолға шыққандар үшін сақтық қажет. Өңірде ауа температурасы –2 мен +5 градус аралығында сақталады.
Елордада да қысқы қолайсыздық сезіледі. Астанада аздап қар жауып, жер бауырлаған боран соғып, жолдар көктайғаққа айналуы мүмкін. Ауа температурасы түнде –15–18 градусқа дейін төмендейді.
Мамандар тұрғындарды алыс жолға шыққанда мұқият болуға, ауа райы туралы ескертулерді ескеріп, қауіпсіздік шараларын сақтауға шақырады.