Алматы қаласындағы химия-биология бағытындағы Зияткерлік мектебі «Туған елге тағзым» жазғы өлкетану-зерттеулік экспедициясы барысымен Іле Алатау оңірінің көрнекті нысандарына жорыққа шықты.
Бір аптаға созылатын берері мол экспедицияға жолдаманы мектептің үздік оқушылары ұтып алды, деп хабарлайды Almaty-akshamy.kz.
Он жылдан астам уақыт жалғасып, дәстүрге айналған «Туған елге тағзым» өлкетану және ғылыми-зерттеу экспедициясы – оқушылардың академиялық және ғылыми жобалық іс-әрекеттерін біріктіруді жүзеге асыруға арналған бірегей эксперименталды алаң. Алматылық зияткерлер экспедицияның барысында өңірдің көрнекті жерлерін аралап қана қоймай, ғылыми жобалар портфолиоларын құнды ақпараттармен, зерттеулермен толықтырады.
Түрген шатқалының әйгілі Аюлы сарқырамасы оқушыларды жаңа ғылыми жобаларға шабыттандырып, жаңа идеялар туындады.
«Сарқырамаға барар жолдың жағдайына қарап, “Экотуризм” тақырыбында мобильдік қосымшаны әзірлеу ой келді. Яғни, ғылыми жобамыздың мақсаты - Қазақстандағы экотуризмді дамыту жолдарын қарастыру болып табылады», – деп әңгімеледі 9-сынып оқушысы Қосан Арлан.
«Біз Түрген шатқалында орналасқан Аюлы сарқырамаға бардық. Көргеніміз бойынша, жол өте жаман, ұзақ әрі қиын. Өкінішке орай осындай жолдар арқылы қозғалу жасы үлкен не мүмкіндіктері шектеулі жандарға қиындық туындатады. Біздің топ осы туралы ойланып, онлайн-экскурсияларды жасау шешімге келді. Осы арқылы адам VR-көзілдіріктер киіп, өзін сол жердегідей сезіне алады. Бұл ғаламтордан суреттерді қарағаннан әлде қайда қызығырақ. Жобамыз шектеулері бар адамдарға көмектесіп, туризмді арттырады»,- деп бөлісті 9-сынып оқушысы Базарбай Арслан.
«Жобамызды іске асыру үшін, керекті жерге барып, барлық аймақты 360⁰ жасап түсіру, және оны арнайы бағдарламаға салып VR-көзілдіріктер үшін қолданысқа жарамды суреттерді шығарып, онлайн экскурсияға даярлау керек. Оны әрі қарай дамыту үшін, сайт жасауды көздеп отырмыз»,- деп толықтырды зияткер.
Жылда Назарбаев Зияткерлік мектептерінде жаздық жорыққа шығатын экспедицияның ізімен оқушылар шамамен жиырмаға жуық жаңа жобаларды бастап, зерттеу жүргізіп, сол жұмыстарымен республикалық деңгейде түрлі ғылыми жобалар байқауына қатысып әлеуметтік, техника, инновация саласында жаңалықтар ашуда.
