Министрлік дәріханаларға ескерту жасады.
Жыл басынан бері "Трамадолды" заңсыз сақтағаны үшін үш адам қамауға алынды,деп хабарлайды aqshamnews.kz
Ішкі істер министрлігі дәріханалар мен фармацевтикалық компанияларға "Трамадолды" рецептсіз сатқаны үшін қылмыстық жаза қарастырылғанын еске салды.
2023 жылы "Трамадол" психотроптық заты есірткі заттарының тізіміне енгізілген болатын. Қазіргі кезде бұл препарат дәрігердің рецепті бойынша тиісті лицензиясы бар дәріханаларда ғана сатылады. Ал есірткі және психотроптық заттарды рецептісіз сату бойынша үнемі жедел-іздестіру іс-шаралары өткізіледі.
Мәселен, жыл басынан бері "Трамадолды" заңсыз сақтағаны үшін үш адам қамауға алынды. Олардан 2500-ден астам таблетка тәркіленді.
"Осыған байланысты дәріханалар мен фармацевтикалық компаниялардың басшыларына қолданыстағы заңнама талаптарын қатаң сақтау қажет екенін еске саламыз. Медицинада қолданылатын психотроптық заттар мен есірткілерді рецептсіз сату Қылмыстық кодекстің 297-бабы 3-бөлігімен қаралып, "есірткіні заңсыз өткізу" болып саналатынын ескертеміз. Ол үшін 10 жылдан 15 жылға дейін бас бостандығынан айыру жазасы қарастырылған", - дейді есірткі қылмысына қарсы іс-қимыл комитеті басқармасы бастығының орынбасары Айбек Брыков.