Ақмола облысының Қорғалжын ауданында орналасқан Шөптікөл бөгеті бұзылды. Қазір нысанды қалпына келтіру және су ағынын қауіпсіз өткізу жұмыстары жүргізіліп жатыр, – деп хабарлайды aqshamnews.kz тілшісі.
Гидротехникалық құрылыс Сабынды ауылынан солтүстікке қарай 2 шақырым қашықта орналасқан.
Төтенше жағдайлар министрлігінің мәліметінше, оқиға орнында салдарды жоюға жедел күштер жұмылдырылған. Атап айтқанда, ТЖМ бөлімшелері, жергілікті атқарушы органдар, аудандық полиция қызметкерлері мен жол саласының мамандары жұмыс істеп жатыр.
Қазір бөгетті бекіту, инертті материалдар төсеу және суды бұру шаралары қолға алынған. Апат салдарын жою жұмыстарына шамамен 170 адам мен 43 техника тартылған.
Ведомство өкілдері жағдай Төтенше жағдайлар министрлігінің тұрақты бақылауында екенін мәлімдеді.