Президент Қасым-Жомарт Тоқаев қазақстандықтарды Абай Құнанбайұлының 180 жылдық мерейтойымен құттықтады, деп хабарлайды Aqshamnews.kz Ақордаға сілтеме жасап.
"Абай – төл мәдениетімізді дамытуға өлшеусіз үлес қосқан әлемдік деңгейдегі кемеңгер тұлға, халқымыздың сана-сезімін жаңғыртқан ұлы ақын. Ол жаңа әдебиетіміздің негізін қалап, дүниетанымымыздың көкжиегін кеңейтті. Өскелең ұрпақты білімпаз, еңбекқор, адал азамат болуға шақырып, ұлттың жаңа сапасын қалыптастыратын қасиеттерді кеңінен дәріптеді. Отанға деген сүйіспеншіліктің және ел мүддесі үшін қалтқысыз қызмет етудің озық үлгісін көрсетті" деді Қасым-Жомарт Тоқаев.
Сондай-ақ ол Хәкім Абайдың мол мұрасы – қазақ халқының ғана емес, барша адамзаттың өнеге алатын асыл қазынасы екенін атап өтті.
"Оның ой-толғамдары мен өсиеттерінің өзектілігі ешқашан жоғалмайды. Сондықтан Абайды тану және таныту, шығармашылығын терең зерделеу өте маңызды. Бүгінгі салтанатты іс-шараның түпкі мәні де – осында" деді Президент.
Ол Шығыс өңірін Абаймен қатар Шәкәрім Құдайбердіұлы, Мұхтар Әуезов сынды ұлттың ұлы перзенттерін дүниеге әкелген киелі өлке екенін еске салды. Мемлекет осы аймақты ұлттық құндылықтар мекені ретінде өркендетуге баса мән беретінін де қоса кетті.
"Ұлы ойшылдың өміршең өлеңдері мен қастерлі қара сөздері әлі талай ұрпаққа рухани азық болары анық" деп аяқтады сөзін мемлекет басшысы.