Қазақстан Президенті Қасым-Жомарт Тоқаев Үкіметтің қосылған құн салығының (ҚҚС) мөлшерлемесін арттыру туралы бастамасын қолдайтынын мәлімдеді. Мемлекет басшысы салық жүйесін реформалауды маңызды деп есептейтінін атап өтті, деп хабарлайды aqshamnews.kz.
– «Жұмысты бастаңдар. Реформа қажет деп есептеймін. Бірақ қазіргі кезде алдымызда Ұлттық қордан трансферттерді азайту, оның жинақтау функциясын күшейту міндеті тұр. Жинақталған қаражатты ірі инфрақұрылымдық жобаларды қаржыландыруға бағыттауымыз қажет. Осылайша біз мемлекеттің дамуға бағытталған функциясын күшейтеміз. Менің ойымша, бұл мәселені тереңірек зерделеуіміз керек», – деді Президент.
Бұл қадам салықтық түсімдерді ұлғайту және Ұлттық қордың жинақтау қабілетін арттыру арқылы мемлекеттің экономикалық тұрақтылығын қамтамасыз етуге бағытталған. Президенттің айтуынша, жиналған қаражат елдің инфрақұрылымын дамыту және экономиканы әртараптандыруға жұмсалуы тиіс.
Қосылған құн салығын көтеру мәселесі үкімет деңгейінде және сарапшылардың қатысуымен талқыланатын болады. Бұл шараның шағын және орта бизнеске қалай әсер ететіні де егжей-тегжейлі зерттелмек.