Қазақстан Президенті Қасым-Жомарт Тоқаев Ораза айт мерекесіне орай қазақстандықтарға құттықтау жолдады, деп хабарлайды Aqshamnews.kz тілшісі.
Мемлекет басшысы бұл мейрамның мұсылман қауымы үшін ерекше маңызға ие екенін атап өтіп, оның рухани тазалық, сабырлық, өзара құрмет пен қайырымдылық сияқты ізгі құндылықтарды дәріптейтінін жеткізді. Президенттің айтуынша, ораза ұстаған жұрт иманын күшейтіп, игі істерге ұйытқы болып, мұқтаж жандарға қолдау көрсетеді.
Сондай-ақ Қасым-Жомарт Тоқаев биыл Ораза айттың Наурыз мерекесімен тұспа-тұс келуінің символдық мәні зор екенін атап өтті. Оның пікірінше, бұл кезең ел дамуындағы жаңа тарихи белеспен сабақтасып жатыр. Президент жаңа Конституцияның қабылдануын халықтың жарқын болашаққа, әділеттілік пен өркендеуге жасаған таңдауы ретінде бағалады.
Мемлекет басшысы барша қазақстандықтарға денсаулық, бақ-береке мен табыс тілеп, ел тыныштығы мен бірлігінің нығая беруіне тілектестік білдірді.