Қазақстан президенті Қасым-Жомарт Тоқаев АҚШ астанасы Вашингтонда Әзербайжан мен Армения арасында қол қойылған бейбітшілік келісімін тарихи маңызы бар жетістік деп атады, деп хабарлайды Aqshamnews.kz Ақорда баспасөз қызметіне сілтеме жасап.
Ақорданың мәліметінше, бұл құжат екі мемлекет арасындағы ұзақ жылдар бойы жалғасқан әскери қақтығысты тоқтатып, тұрақты бейбітшілік негізінде дипломатиялық қатынастар орнатуға және ынтымақтастықты дамытуға жол ашты.
Мемлекет басшысының пікірінше, Әзербайжан мен Арменияның мұндай келісімге қол қоюы – АҚШ Президенті Дональд Трамптың тегеурінді әрі тиімді бітімгерлік миссиясының арқасы. Ол Әзербайжан және Армения басшыларын саяси ерік-жігер танытып, стратегиялық тұрғыдан көреген шешім қабылдауға көндіре алды.
Президент Қасым-Жомарт Тоқаев Қазақстан да екі ел арасындағы осынау маңызды уағдаластыққа қол жеткізуге елеулі үлес қосты деп санайды.
Еліміз бейбіт келісімнің негізгі шарттарына қатысты сыртқы істер министрлерінің деңгейіндегі келіссөз алаңы ретінде Алматы қаласын ұсынды.
Министрлер арасындағы келіссөздер Алматыда өтті.