Алматыда полиция мопедтерді тұрған орнында тіркеуде, - деп хабарлайды aqshamnews.kz Polisia.kz-ке сілтеме жасап.
Алматы қаласында мопедтерді тіркеу жұмыстары белсенді түрде жалғасып жатыр. Бүгінгі күнге дейін осы санаттағы көлік құралдарының 15 мыңға жуығы тіркелген. Қалалық полиция қызметкерлері азаматтардың қолайлылығы үшін тіркеу жұмыстарын көліктердің тұрақты тұрағында, сондай-ақ сату орындарында да жүргізуде. Бұл тәсіл мопед иелеріне көліктерін қысқа мерзімде әрі ыңғайлы түрде заңдастыруға мүмкіндік береді. Полиция мопедті тіркеусіз, арнайы куәліксіз, мемлекеттік нөмірсіз және сақтандырусыз басқару ҚР заңнамасына сәйкес әкімшілік жауапкершілікке әкеп соғатынын ескертеді. Алматы қаласының аумағында "Заң және Тәртіп" және "Профилактика жылы" аясында жол қозғалысы қауіпсіздігін қамтамасыз ету бағытында кешенді шаралар жүргізілуде.
"Мопедті тіркеу — жай формальдылық емес. Бұл — жол қозғалысына қатысушылардың қауіпсіздігі мен өзіңіздің азаматтық жауапкершілігіңіз. Барлық көлік иелерін көліктерін дер кезінде тіркеуге шақырамыз. Полиция бұл бағыттағы бақылау шараларын жүйелі түрде жалғастырады", деді Алматы қалалық ПД әкімшілік полиция басқармасы процессинг орталығының бастығы Айдын Меркімбаев.
Полиция қызметкерлері тіркелмеген мопедпен жүру — заң бұзушылық екенін және ол үшін айыппұл салынатынын, тіпті көлік құралы тәркіленуі мүмкін екенін тағы бір мәрте еске салады.