Теміржол станциясында мас әйел пойыз астына түсе жаздады. Машинист бірнеше тонна тартатын пойыз құрамын дер кезінде тоқтатты, - деп хабарлайды Аqshamnews.kz тілшісі.
Оқиға түнгі сағат 10 шамасында болған.
"Қазақстан темір жолы" ҰК" АҚ мәліметінше, 23 шілдеде сағат 21:41-де Тобыл – Қостанай учаскесінде Астана – Орал бағыты бойынша келе жатқан "Тальго" жолаушылар пойызының машинисті рельстен әйел адамды байқап қалып, шұғыл түрде тежеу қолданған. Алдын ала мәлімет бойынша, әйел адам мас күйінде болған.
"Машинистің жедел әрі кәсіби әрекетінің арқасында қайғылы оқиға болмады. Әйел зардап шеккен жоқ және ол желілік полиция бөлімінің қызметкерлеріне тапсырылды", — деп мәлімдеді "Қазақстан темір жолы" баспасөз қызметі.
Оқиға салдарынан пойыздың жүруі 12 минутқа кешіккен.
ҚТЖ өкілдері белгіленбеген жерде теміржолды кесіп өту, әсіресе мас күйде, өте қауіпті екенін және ауыр салдарға әкелуі мүмкін екенін ескертті.
Айта кетейік, бұған дейін Алматы-2 станциясында 15 жастағы жасөспірім вагонның төбесіне шығып, тоқ соғып, қатты күйік алған болатын.