Қазақстан Республикасы ІІМ Ұлттық ұланы «Оңтүстік» өңірлік қолбасшылығының жауынгерлері қазақ еліне танымал спортшы, рекордсмен Темір Спатаевпен жүздесті. Күш экстримі бойынша бірнеше дүркін рекорд иесімен кездесуді қолбасшылықтың Тәрбие және әлеуметтік-құқықтық жұмыстар басқармасы өкілдері ұйымдастырды.
Ұлттық ұланның 3660 әскери бөлімінде өткен іс-шараға 250-ден аса сарбаз қатысты. Темір Спатаевтың спортта жүргеніне 30 жылға жуықтаған. Ол кездесу барысында биік белестерді тек ерен еңбектің арқасында бағындырғанын айтты. Сарбаздардың денені шынықтыру және моральдық дайындығының маңыздылығын талқылап, мықты тұлға болып қалыптасудағы патриотизмнің рөлін атап өтті. Сондай-ақ армандарға жетудің жолдарымен бөлісіп, құқықтық тәртіп әскері жауынгерлерін салауатты өмір салтын ұстануға шақырды.
Темір Спатаевтың күш экстримі бойынша кәсіби түрде айналысып, рекорд орнатып жүргеніне жеті жылдай болған.
– Спортты жаным сүйеді. Мақсатым – осы спорт түрін елге, әлемге танытып, жастар арасында насихаттау. Өскелең ұрпақты шыңдап, білімді етіп, патриоттық сезімін оятқым келеді. Сондықтан оқушылармен және қазақ әскеріндегі сарбаздармен осылай жиі кездесіп жүрмін. Әрине, айналысып жүрген ісімді өзім ғана білсем деген ой жоқ. Қазақтың әр баласы мықты болсын. Біз батыр бабаларымыздың ұрпағы екенімізді ұмытпауымыз керек, – дейді күш экстримі бойынша рекордсмен Темір Спатаев.
Кездесу кезінде қара күш иесі әскери қызметшілер арасында белтемірге тартылу, гір тасын көтеру, салмағы 25 келі болатын болат қылышты бір қолымен тіке ұстап тұру секілді жарыстар ұйымдастырды. Жақсы нәтиже көрсеткен ұландықтарға алыптар сайысы бренді бейнеленген футболкалар тарту етті.
Әскери қызметтегі нәзік жанды арулар арасында да болат қылышты бір минуттан аса көтерген лейтенант Әлия Әбдіғалиеваға темір шегені иіп жүрек пішінін жасап, сыйлады.
Айта кетейік, Темір Спатаев халық арасында «темір адам» деген лақап атпен танымал. Ол армрестлингтен халықаралық деңгейдегі спорт шебері, Азия чемпионы, Бауыржан Момышұлы атындағы «Намыс» төсбелгісінің иегері. Мас-рестлингтен әлем чемпионатының жүлдегері. Сонымен қатар, ол «Толағай» ұлттық спорт федерациясының негізін қалаушы.