Маск Дуровтың жетістігін жоғары бағалады
Американдық кәсіпкер Илон Маск Telegram негізін қалаушы Павел Дуровтың мессенджердегі рекордтық жетістігін мақтады.
«Керемет жұмыс», – деп жазды миллиардер X әлеуметтік желісіндегі парақшасында.
Дуров 2024 жылдың Telegram үшін тарихи жыл болғанын мәлімдеді: монетизация бағдарламасы іске қосылғаннан кейін үш жыл ішінде сервис алғаш рет пайдаға шықты.
2024 жылы мессенджердің жалпы табысы бір миллиард доллардан асты. Telegram Premium ақылы жазылымын пайдаланушылар саны үш есе өсіп, 12 миллионға жетті. Сонымен қатар, Дуров жарнама табысының бірнеше есе артқанын айтып, жылдың 500 миллион доллардан астам ақшалай резервпен аяқталғанын жеткізді.
Дуров Telegram-ды монетизациялау бастамасын 2020 жылдың соңында жариялаған еді. Бұл шешімнің себебі ретінде қолданушылар санының көбеюіне байланысты мессенджерді қызмет көрсету шығындарының өсуін атады. Монетизация бағдарламасы 2021 жылы іске қосылған болатын.